ಭಾರತ ವಿಶ್ವದ ಯಾವುದೇ ಶಕ್ತಿಯ ಮುಂದೆ ತಲೆಬಾಗಿಲ್ಲ, ಮುಂದೆ ಬಾಗುವದೂ ಇಲ್ಲ, ನಿಮ್ಮಂಥ ಧೈರ್ಯಶಾಲಿಗಳಿಂದಾಗಿ ಇಂತಹ ಮಾತುಗಳನ್ನಾಡುತ್ತಿದ್ದೇನೆ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದರು.
ಅವರು ಚೀನಾ-ಭಾರತೀಯ ಸೈನಿಕರ ಸಂಘರ್ಷಕ್ಕೆ ಕಾರಣವಾಗಿರುವ ಲಡಾಖ್‌ ನ ನಿಮ್ಮೂ ಸೆಕ್ಟರ್ ಗೆ ಶುಕ್ರವಾರ ದಿಢೀರ್ ಭೇಟಿ ನೀಡಿ ಅಲ್ಲಿಯ ಯೋಧರನ್ನು ಉದ್ದೇಶಿಸಿ ಮಾತನಾಡಿದರು.
ದೇಶ್ವಾದ್ಯಂತ ಭಾರತೀಯ ಸೈನಿಕರ ಶೌರ್ಯದ ಬಗ್ಗೆ ಚರ್ಚೆಯಾಗುತ್ತಿದೆ. ಭಾರತ ಮಾತೆಯ ವಿರೋಧಿಗಳು ನಿಮ್ಮ ತಾಕತ್ತು, ಕೋಪವನ್ನು ನೋಡಿದ್ದಾರೆ
ನಿಮಗೆ ಪ್ರತಿಯೊಬ್ಬರಿಗೂ ಧನ್ಯವಾದ ಹೇಳಲು ನಾನಿಲ್ಲಿಗೆ ಬಂದಿದ್ದೇನೆ. ನಮ್ಮ ಭಾರತ ಸ್ವಾವಲಂಬಿಯಾಗಿದೆ. ನಮ್ಮ ದೇಶ ಎಂದಿಗೂ ವಿಶ್ವದ ಯಾವುದೇ ಶಕ್ತಿಯ ಮುಂದೆ ತಲೆಬಾಗಿಲ್ಲ. ಬಾಗುವುದೂ ಇಲ್ಲ.
ಯಾವ ಎತ್ತರದ ಪ್ರದೇಶದಲ್ಲಿ ನೀವು ಕರ್ತವ್ಯ ನಿರ್ವಹಿಸುತ್ತಿರುವಿರೋ ಅದಕ್ಕಿಂತಲೂ ಎತ್ತರವಾದದ್ದು ನಿಮ್ಮ ಧೈರ್ಯ ಮತ್ತು ಶೌರ್ಯ. ನಿಮ್ಮ ತ್ಯಾಗ ಮತ್ತು ಬಲಿದಾನ, ಶೌರ್ಯ ಮತ್ತು ಸಾಹಸ ಆತ್ಮ ನಿರ್ಭರ್ ಭಾರತದ ಸಂಕಲ್ಪಕ್ಕೆ ಬಲ ನೀಡಿದೆ. ಸ್ವಾವಲಂಬಿಗಳಾಗಬೇಕು ಎಂಬ ನಮ್ಮ ಸಂಕಲ್ಪ ಇದೀಗ ಇನ್ನಷ್ಟು ಗಟ್ಟಿಯಾಗಿದೆ ಎಂದು ಹೇಳಿದರು.
ನಿಮ್ಮಂಥ ಧೀರೋದಾತ್ತ ಯೋಧರಿಗೆ ಜನ್ಮ ನೀಡಿದ ನಿಮ್ಮೆಲ್ಲ ತಾಯಂದಿರು ಹಾಗೂ ಶೂರರೂ, ವೀರರೂ ಆದ ತಮಗೆ ತಲೆಬಾಗಿ ವಂದಿಸುವೆ. ನಮ್ಮನ್ನು ಅಗಲಿದ ಶೂರರು ಯಾರೂ ಸುಮ್ಮನೇ ಸದ್ಗತಿ ಪಡೆದುಕೊಳ್ಳಲಿಲ್ಲ. ಅವರೆಲ್ಲರೂ ಶತ್ರು ಪಾಳೆಯದವರಿಗೆ ದಿಟ್ಟತನದ ಪ್ರತಿರೋಧ ತೋರಿ, ಪಾಠ ಕಲಿಸಿಯೇ ಹೋಗಿದ್ದಾರೆ. ನಿಮ್ಮ ಸಾಹಸ, ನೀವು ಸುರಿಸುವ ರಕ್ತದ ಪ್ರತಿ ಕಣವೂ ನಮ್ಮ ಯುವಶಕ್ತಿ ಮತ್ತು ಜನರಿಗೆ ಪೀಳಿಗೆಗಳವರೆಗೆ ಸ್ಫೂರ್ತಿ ಉಕ್ಕಿಸುತ್ತವೆ. ದೇಶದ 130 ಕೋಟಿ ಜನ ನಿಮ್ಮ ಬಗ್ಗೆ ಹೆಮ್ಮೆಪಡುತ್ತಿರುವುದು ನಿಮಗೆ ತಿಳಿದಿಲ್ಲದಿರಬಹುದು. ಧೈರ್ಯಶಾಲಿಗಳಾದ ನೀವು ತೋರಿದ ಶೌರ್ಯ ಇಡೀ ಜಗತ್ತಿಗೆ ಸಂದೇಶ ರವಾನೆಯಾಗಿದೆ ಎಂದು ಹೇಳಿದರು.