ನವರಾತ್ರಿ ಸಂಭ್ರಮಾಚರಣೆ, ನವ ನೈವೇದ್ಯಗಳು ಹೀಗಿರಲಿ

ನವರಾತ್ರಿಯ ಮೊದಲ ದಿನ ಅಂದರೆ ಪಾಡ್ಯದಂದು ತಲೆಗೆ ಎಣ್ಣೆ ಹಚ್ಚಿ ಸೀಗೆಪುಡಿಯಿಂದ ತಲೆ ಸ್ನಾನ ಮಾಡಿ ದೇವರನ್ನು ಮತ್ತು ದೇವರ ಗುಡಿಯನ್ನು ಸ್ವಚ್ಛಗೊಳಿಸಿ. ದೇವರ ಮನೆಯಲ್ಲಿ ಎರಡು ಕಳಸ, ಪಟ್ಟದ ಗೊಂಬೆಗಳು, ಚಾಮುಂಡೇಶ್ವರಿ ದೇವಿಯ ಫೋಟೊ ಇಟ್ಟು ಪ್ರತಿದಿನ ಗೆಜ್ಜೆ ವಸ್ತ್ರ ಹಾಕಿ ಸಹಸ್ರನಾಮ ಓದಿ ಕುಂಕುಮಾರ್ಚನೆ ಮಾಡಿ ಸಿಹಿ ಅಡುಗೆ ತಯಾರಿಸಿ ನೈವೇದ್ಯ ಮಾಡಿ.

ಪ್ರತಿದಿನ ಮನೆಯ ಎಲ್ಲಾ ಹೊಸ್ತಿಲಿನ ಎರಡೂ ಕಡೆ ಎರಡೆರಡು ಶ್ರೀಗಂಧ ಮತ್ತು ಅರಿಶಿನ ಬೆರೆಸಿದ ಚುಕ್ಕಿ ಇಟ್ಟು ಅದರ ಮೇಲೆ ಕುಂಕುಮ, ಕೇಸರಿ ಬಣ್ಣದ ಚಂದ್ರ ಬೊಟ್ಟು ಇಟ್ಟು ಹೊಸ್ತಿಲಿಗೆ ಅರಿಶಿನ ಕುಂಕುಮ ಮತ್ತು ಅಕ್ಷ ತೆ ಹೂಗಳಿಂದ ಪೂಜೆ ಮಾಡಿ. ದಿನವೂ ಒಂದೊಂದು ಹೊಸ್ತಿಲಿಗೆ ಗೆಜ್ಜೆ ವಸ್ತ್ರ ಹಾಕಿ ನೈವೇದ್ಯ ಮತ್ತು ಮಂಗಳಾರತಿ ಮಾಡಿ.

ಸಂಜೆ ವೇಳೆ ಮುಂದಿನ ಬಾಗಿಲಿನ ಹೊಸ್ತಿಲನ್ನು ಒರೆಸಿ ಅರಿಶಿನ ಕುಂಕುಮ ಹೂಗಳನ್ನಿಟ್ಟು ದೇವರಿಗೆ, ಕಳಸಕ್ಕೆ, ಪಟ್ಟದ ಗೊಂಬೆಗಳಿಗೆ ಮತ್ತು ದೇವರ ಫೋಟೊಗೆ ಆರತಿ ಮಾಡಿ. ಪ್ರತಿದಿನ ಒಂದೊಂದು ತರಹದ ಪಾಯಸ, ಮೊಸರನ್ನ, ಹೆಸರುಬೇಳೆ ಅಥವಾ ಕಡ್ಲೆಬೇಳೆಯ ಕೋಸಂಬರಿ, ಹಸುವಿನ ಹಾಲು, ಕಾಯಿ, ಹಣ್ಣು, ಎಲೆ ಅಡಿಕೆಗಳನ್ನಿಟ್ಟು ಪೂಜೆ ಮಾಡಿ ಆರತಿ ಮಾಡಿ. ನವರಾತ್ರಿಯ ಒಂಬತ್ತು ದಿನವೂ ದೇವಿ ಮಹಾತ್ಮೆ ಮತ್ತು ಭಗವದ್ಗೀತೆಯನ್ನು ಓದಿ.

ನವರಾತ್ರಿಗೆ ಬಹುತೇಕ ಮನೆಗಳಲ್ಲಿ ಹೆಚ್ಚು ಗೊಂಬೆಗಳನ್ನು ಕೂರಿಸಿ ಪ್ರತಿದಿನ ಎರಡು ಹೊತ್ತು ಪೂಜೆ, ನೈವೇದ್ಯ, ಭಜನೆ, ಹಾಡು ಇತ್ಯಾದಿಗಳನ್ನು ಹಾಡಿ ಎಲ್ಲರನ್ನೂ ಅರಿಶಿನ ಕುಂಕುಮಕ್ಕೆ ಕರೆಯುತ್ತಾರೆ. ಇದರಿಂದ ಲಕ್ಷ್ಮಿ ಒಲಿಯುತ್ತಾಳೆಂದು ಪ್ರತೀತಿ ಇದೆ. ಪಟ್ಟದ ಗೊಂಬೆಗಳು ರಾಜ ರಾಣಿಯರ ಸಂಕೇತವಾಗಿವೆ.

ನವ ನೈವೇದ್ಯ

ಪಾಡ್ಯ-ಹೋಳಿಗೆ, ಚಿತ್ರಾನ್ನ, ಶ್ಯಾವಿಗೆ ಪಾಯಸ, ಮೊಸರನ್ನ

ಬಿದಿಗೆ-ಹೆಸರುಬೇಳೆ ಪಾಯಸ, ಮೊಸರನ್ನ

ತದಿಗೆ-ಸಬ್ಬಕ್ಕಿ ಪಾಯಸ, ಮೊಸರನ್ನ

ಚೌತಿ-ಪೊಂಗಲ್‌, ಮೊಸರನ್ನ

ಪಂಚಮಿ-ಗೋಧಿ ಪಾಯಸ, ಮೊಸರನ್ನ

ಷಷ್ಠಿ-ಸಜ್ಜಿಗೆ, ಮೊಸರನ್ನ, ವಡೆ

ಸಪ್ತಮಿ-ಪಂಗನಾಲು, ಮೊಸರನ್ನ

ಅಷ್ಟಮಿ-ಕರಿಗಡುಬು, ಚಿತ್ರಾನ್ನ, ಮೊಸರನ್ನ, ವಡೆ, ಪಾಯಸ

ನವಮಿ-ಹಾಲು ಹೋಳಿಗೆ, ಹುಳಿಯನ್ನ, ಮೊಸರನ್ನ

ದಶಮಿ-ಹೋಳಿಗೆ, ಪಾಯಸ, ಚಿತ್ರಾನ್ನ, ಮೊಸರನ್ನ