ಶಿವಮೊಗ್ಗ: ಜೀವವೈವಿಧ್ಯ ಇತಿಹಾಸದಲ್ಲಿ ಹೊಸದೊಂದು ಕೌತುಕ ದಾಖಲಾಗಿದೆ. ಶಿವನಕುದುರೆ ಎಂದೇ ಕರೆಸಿಕೊಳ್ಳುವ ಮಿಡತೆಯು(ಮ್ಯಾಂಟಿಸ್‌) ಮೀನು ಬೇಟೆಯಾಡುವುದನ್ನು ಮೊದಲ ಬಾರಿಗೆ ಸಂಶೋಧಕರು ಪತ್ತೆ ಮಾಡಿದ್ದು ಸಂಶೋಧನಾ ವಲಯದಲ್ಲಿ ಅಚ್ಚರಿ ಮೂಡಿಸಿದೆ.
ಸಾಮಾನ್ಯವಾಗಿ ಮಿಡತೆಯು ಸೊಳ್ಳೆ, ನೋಣ, ಜೇನು ಹುಳ ಮುಂತಾದ ಕೀಟಗಳನ್ನು ಬೇಟೆಯಾಡುತ್ತದೆ. ಆದರೆ ವಿಜ್ಞಾನಿಗಳು ಬೆರಗಾಗುವ ವಿದ್ಯಮಾನ ಬೆಂಗಳೂರು ಮಾಗಡಿ ರಸ್ತೆಯ ಕಡಬಗೆರೆಯಲ್ಲಿ ಬಾವುಲಿ ಸಂಶೋಧಕ ರಾಜೇಶ್‌ ಪುಟ್ಟಸ್ವಾಮಿ ಅವರ ತೋಟದಲ್ಲಿ ಗೋಚರವಾಗಿದೆ.
ಜಲನೈದಿಲೆ, ಅಂತರಗಂಗೆ ಜಲ ಸಸ್ಯಗಳಿಂದ ಕೂಡಿದ ಗಪ್ಪಿ, ಮೊಲ್ಲಿ, ಝಿಬ್ರಾ ಮತ್ತು ಸಕರ್‌ ಜಾತಿಯ 40 ಬಗೆಯ ಮೀನುಗಳಿರುವ ಕೊಳದಲ್ಲಿ ಪ್ರಾರ್ಥನಾ ಮಿಡತೆಯು ಗಪ್ಪಿ ಮೀನನ್ನು ಬೇಟೆಯಾಡುವುದನ್ನು ಸಂಶೋಧಕರು ಗುರುತಿಸಿದ್ದಾರೆ. ಅದು ಒಮ್ಮೆಯಲ್ಲ ದಿನಕ್ಕೆ ಎರಡು ಬಾರಿಯಂತೆ ಸತತ ಐದು ದಿನ ಮಿಡತೆಯು ಮೀನು ಬೇಟೆಯಾಡಿದೆ. ಇಟಲಿಯ ವಿಜ್ಞಾನಿ ಡಾ. ರಾಬರ್ಟೋ ಬ್ಯಾಟಿಸ್ಟನ್‌, ಗದಗ ಜಿಲ್ಲೆ ರೋಣದ ವೈಲ್ಡ್‌ಲೈಫ್‌ ವೆಲ್ಫೇರ್‌ ಸೊಸೈಟಿಯ ಜೀವವೈವಿಧ್ಯ ಸಂಶೋಧಕ ಮಂಜುನಾಥ ನಾಯಕ್‌ ಮತ್ತು ಬ್ಯಾಟ್ಸ್‌ ಕನ್ವರ್ಷನ್‌ ಇಂಡಿಯನ್‌ ಟ್ರಸ್ಟ್‌ನ ಬಾವಲಿ ಸಂಶೋಧಕ ರಾಜೇಶ್‌ ಪುಟ್ಟಸ್ವಾಮಿ ಅವರು ಬೇರೊಂದು ವಿಷಯದ ಮೇಲೆ ನಡೆಸುತ್ತಿದ್ದ ಅಧ್ಯಯನದ ಸಂದರ್ಭದಲ್ಲಿ ಈ ಸಂಗತಿ ಬಯಲಾಗಿದೆ.
ನೀರೊಳಗೆ ಅತಿವೇಗದ ಚಲನೆಯಲ್ಲಿರುವ ಗಪ್ಪಿ ಮೀನುಗಳನ್ನು ಬೇಟೆಯಾಡುವುದು ಎಂದರೆ ಸುಲಭದ ಮಾತಲ್ಲ. ತನ್ನದೆ ಹಸಿರು ಬಣ್ಣ ಹೊಂದಿದ ಜಲನೈದಿಲೆ ಮೇಲೆ ಕುಳಿತು ನೀರೊಳಗಿನ ಮೀನು ಬೇಟೆಯಾಡುವ ಮೂಲಕ ಮಿಡತೆಯು ಕೌಶಲ, ತಂತ್ರಗಾರಿಕೆ ಮತ್ತು ಬುದ್ಧಿಮತ್ತೆ ಪ್ರದರ್ಶಿಸುತ್ತದೆ. ಅದರ ತಲೆಯು 280-320 ಡಿಗ್ರಿಗಳವರೆಗೆ ಸುಲಭವಾಗಿ ತಿರುಗಬಲ್ಲ ಸಾಮರ್ಥ್ಯ‌ಹೊಂದಿದ್ದು ಬೇಟೆ ಹುಡುಕಲು ಸುಲಭವಾಗಿದೆ. ಮುಂಪಾದ ಗರಗಸದಂತಹ ಸೂಕ್ಷ ್ಮ ರಚನೆಗಳನ್ನು ಹೊಂದಿರುವುದರಿಂದ ಸಿಕ್ಕ ಬೇಟೆ ತಪ್ಪಿಸಿಕೊಳ್ಳವುದು ಅಸಾಧ್ಯ.
ಸಂಜೆ ಬೇಟೆ
ಈ ಅಧ್ಯಯನದಲ್ಲಿ ಕಂಡುಬಂದ ಇನ್ನೆರಡು ಪ್ರಮುಖ ಸಂಗತಿಗಳೆಂದರೆ ಮಿಡತೆಯು ಮೀನು ಬೇಟೆಗೆ ಪ್ರತಿದಿನ ಮುಸ್ಸಂಜೆಯಲ್ಲಿ ಬರುತ್ತಿತ್ತು. ಮಂದ ಬೆಳಕಿನಲ್ಲೂ ಮೀನು ಬೇಟೆಯಾಡಿ ಮಿಡತೆಯು ತನ್ನ ಕಣ್ಣುಗಳ ದೃಷ್ಟಿ ಸಾಮರ್ಥ್ಯ‌ವನ್ನು ಪ್ರದರ್ಶಿಸಿದೆ. ಅಲ್ಲದೆ ಕೋಳದಲ್ಲಿ ವಿವಿಧ ಜಾತಿಯ ಮೀನುಗಳಿದ್ದರೂ ಅದು ಗಪ್ಪಿ ಮೀನುಗಳನ್ನು ಮಾತ್ರ ಬೇಟೆಯಾಡಿದೆ. ನೈಸರ್ಗಿಕ ಆವಾಸದಲ್ಲಿ ಅಕಶೇರುಕ(ಮೂಳೆಗಳಿಲ್ಲದ) ಕೀಟವು ಕಶೇರುಕ (ಮೂಳೆಗಳಿರುವ) ಗುಂಪಿಗೆ ಸೇರಿದ ಮೀನುಗಳನ್ನು ಭಕ್ಷಿಸುವ ಮೂಲಕ ಮೀನುಗಳ ಸಮುದಾಯದ ಮೇಲೆ ಬಲವಾದ ಪ್ರಭಾವ ಬೀರಿದೆ.
ಮಿಡತೆಗಳ ವಿಶೇಷ
ಜಗತ್ತಿನಲ್ಲಿ 2,400ಕ್ಕೂ ಅಧಿಕ ಜಾತಿ ಮಿಡತೆಗಳಿದ್ದು ಅವುಗಳಲ್ಲಿ 178 ಜಾತಿ ಮಿಡತೆಗಳು ಭಾರತದಲ್ಲಿವೆ. ಇವುಗಳಲ್ಲಿ ಏಲಿಯನ್‌ಗೆ ಹೋಲುವ ಮಿಡತೆ(ಏಷ್ಯನ್‌ ದೈತ್ಯ ಮ್ಯಾಂಟಿಸ್‌) ಭಾರತದಲ್ಲಿ ಹೆಚ್ಚಾಗಿವೆ. ರಾಜ್ಯದಲ್ಲಿ ಇದಕ್ಕೆ ಶಿವನಕುದುರೆ, ಸೂರ್ಯನ ಕುದುರೆ ಎಂದೂ ಕರೆಯಲಾಗುತ್ತದೆ. ಮುಂಪಾದಗಳು ಸದಾ ಕೈ ಮುಗಿದು ನಿಂತ ಬಂಗಿಯಲ್ಲಿರುವುದರಿಂದ ಪ್ರಾರ್ಥನಾ ಮಿಡತೆ ಅಂತಲೂ ಕರೆಯುತ್ತಾರೆ. ಮಿಡತೆ ಕೃಷಿಗೆ ಪೀಡಕವಾದ ಕೀಟಗಳನ್ನು ಭಕ್ಷಿಸುವುದರ ಮೂಲಕ ಜೈವಿಕ ಕೀಟ ನಿಯಂತ್ರಕವಾಗಿ ಕೆಲಸಮಾಡುತ್ತದೆ. ಆಹಾರ ಸರಪಳಿಯಲ್ಲಿ ಪಕ್ಷಿ, ಹಲ್ಲಿಯಂತಹ ಮೇಲ್ತಸರದ ಜೀವಿಗಳಿಗೆ ಆಹಾರವಾಗಿದೆ. ಕೆಲ ಸಂದರ್ಭದಲ್ಲಿ ಮಿಲನವಾದ ನಂತರ ಹೆಣ್ಣು ಮಿಡತೆಯು ಗಂಡು ಮಿಡತೆಯನ್ನು ತಿನ್ನುತ್ತವೆ.
150 ಮಿಲಿಯನ್‌ ವರ್ಷಗಳ ಇತಿಹಾಸ ಇರುವ ಮ್ಯಾಂಟಿಸ್‌ ಪರಿಸರ ಸಮತೋಲನದಲ್ಲಿ ಪ್ರಮುಖ ಪಾತ್ರವಹಿಸುತ್ತದೆ. ಆದರೆ, ಈ ಇದರ ಬಗ್ಗೆ ಅಧ್ಯಯನ ನಡೆದಿದ್ದು ಬಹಳ ಕಡಿಮೆ. ಮ್ಯಾಂಟಿಸ್‌ನಂತಹ ಕೀಟಗಳು ಅಧ್ಯಯನದಿಂದ ತಾತ್ಸರಕ್ಕೊಳಪಟ್ಟಿವೆ. ಬೇರೊಂದು ಅಧ್ಯಯನದಲ್ಲಿ ತೊಡಗಿದ್ದ ನಮಗೆ ಜೀವ ವೈವಿಧ್ಯದಲ್ಲಿ ಹೊಸದೊಂದು ಕೌತುಕ ತೋರಿದ್ದು, ಮತ್ತಷ್ಟು ಅಧ್ಯಯನ ನಡೆಸುವ ಕುತೂಕಲ ಮೂಡಿಸಿದೆ - ಮಂಜುನಾಥ ನಾಯಕ್‌, ಜೀವ ವೈವಿಧ್ಯ ಸಂಶೋಧಕ, ವೈಲ್ಡ್‌ಲೈಫ್‌ ವೆಲ್ಫೇರ್‌ ಸೊಸೈಟಿ, ರೋಣ.